பாகிஸ்தான் ஆக்கிரமிப்பு காஷ்மீரில் நடைபெற்று வரும் சட்டப்பேரவைத் தேர்தலை புறக்கணிக்கக் கோரி நடைபெற்ற போராட்டம் வன்முறையாக மாறிய நிலையில், பாதுகாப்புப் படையினர் நடத்திய துப்பாக்கிச்சூட்டில் பலர் உயிரிழந்ததாக தகவல்கள் வெளியாகியுள்ளன.ராவலகோட், மிர்பூர் உள்ளிட்ட பகுதிகளில், ஜாயிண்ட் அவாமி ஆக்ஷன் கமிட்டி (JAAC) தலைமையில் ஆயிரக்கணக்கான மக்கள் பேரணி நடத்தினர். பாகிஸ்தான் அரசின் கட்டுப்பாட்டை அதிகரிக்கும் வகையில் இருப்பதாகக் கூறப்படும் தேர்தல் நடைமுறைகளுக்கு எதிராகவும், தேர்தலை புறக்கணிக்க வேண்டும் என்றும் அவர்கள் கோரிக்கை விடுத்தனர்.
போராட்டத்தை கலைக்க பாதுகாப்புப் படையினர் துப்பாக்கிச்சூடு நடத்தியதாக போராட்டக்காரர்கள் குற்றம்சாட்டுகின்றனர். கடந்த 24 மணி நேரத்தில் மட்டும் குறைந்தது 20 பேர் உயிரிழந்ததுடன், 50-க்கும் மேற்பட்டோர் காயமடைந்துள்ளனர் என்ற தகவல்கள் வெளியாகியுள்ளன.
ஜூன் 5 முதல் தொடர் போராட்டங்கள் மற்றும் மோதல்களில் மொத்த பலி எண்ணிக்கை 80-ஐ கடந்துள்ளதாக போராட்ட அமைப்புகள் தெரிவிக்கின்றன. இதற்கிடையில், போராட்டக்காரர்களின் குற்றச்சாட்டுகளை பாகிஸ்தான் அரசு மறுத்துள்ளது.
சில இடங்களில் ஆயுதம் ஏந்திய குழுக்கள் பாதுகாப்புப் படையினரை தாக்கியதாகவும், சட்டம்-ஒழுங்கை நிலைநிறுத்தவே நடவடிக்கை எடுக்கப்பட்டதாகவும் அதிகாரிகள் விளக்கம் அளித்துள்ளனர்.
இந்தச் சம்பவம் தொடர்பாக வெளிப்படையான விசாரணை நடத்த வேண்டும் என்றும், தகவல் தொடர்பு கட்டுப்பாடுகளை நீக்கி, ஊடகங்களுக்கு சுதந்திரமாக செயல்பட அனுமதி வழங்க வேண்டும் என்றும் சர்வதேச மனித உரிமை அமைப்புகள் வலியுறுத்தியுள்ளன.
