சென்னை: மத்திய அரசின் பி.எம்.ஸ்ரீ பள்ளிகள் திட்டத்தை கேரளாவில் காங்கிரஸ் மற்றும் கம்யூனிஸ்ட் கட்சிகள் ஆதரித்து செயல்படுத்தும் நிலையில், தமிழ்நாட்டில் அதே கட்சிகள் எதிர்ப்பது ஏன் என தமிழக பாஜக இளைஞரணி தலைவர் வினோஜ் பி. செல்வம் கேள்வி எழுப்பியுள்ளார்.
சமூக வலைதளமான எக்ஸ் தளத்தில் வெளியிட்டுள்ள பதிவில், அரசு பள்ளிகளின் உள்கட்டமைப்பு, கற்பித்தல் தரம் மற்றும் மாணவர்களின் கல்வித் திறனை மேம்படுத்தும் நோக்கில் செயல்படுத்தப்படும் பி.எம்.ஸ்ரீ திட்டம் நாடு முழுவதும் வரவேற்பைப் பெற்றுள்ளதாக அவர் தெரிவித்துள்ளார்.
கேரளாவில் காங்கிரஸ் மற்றும் கம்யூனிஸ்ட் கட்சிகள் இந்த திட்டத்தை ஏற்றுக்கொண்டுள்ள நிலையில், தமிழ்நாட்டில் மட்டும் அரசியல் காரணங்களுக்காக எதிர்க்கப்படுவதாகவும் அவர் குற்றம்சாட்டியுள்ளார்.
மேலும், தமிழகத்தின் பெரும்பாலான தனியார் பள்ளிகளில் தமிழ், ஆங்கிலம் மற்றும் இந்தி உள்ளிட்ட மும்மொழிக் கல்வி நடைமுறையில் உள்ளதாகவும், ஆனால் அரசு பள்ளி மாணவர்களுக்கு மட்டும் இருமொழிக் கொள்கை போதுமானது என கூறப்படுவது ஏன் என்றும் அவர் கேள்வி எழுப்பியுள்ளார்.
அரசு பள்ளிகளில் மும்மொழிக் கல்வி நடைமுறைப்படுத்தப்பட்டால், தனியார் பள்ளிகளின் மாணவர் சேர்க்கை பாதிக்கப்படும் என்பதால்தான் இந்த திட்டத்திற்கு எதிர்ப்பு தெரிவிக்கப்படுகிறதா என்ற சந்தேகத்தையும் அவர் முன்வைத்துள்ளார்.
மேலும், முதல்வர் விஜய் நடத்தி வரும் விஜய் வித்யாஷ்ரம் பள்ளியில் மும்மொழிக் கல்வி நடைமுறையில் இருப்பதாகக் குறிப்பிட்டுள்ள அவர், அதே வாய்ப்பை அரசு பள்ளி மாணவர்களுக்கும் வழங்குவதில் என்ன பிரச்சினை உள்ளது என்றும் கேள்வி எழுப்பியுள்ளார்.
மும்மொழிக் கல்வி வேண்டும் அல்லது வேண்டாம் என்பதை அரசியல் கட்சிகள் தீர்மானிப்பதற்கு பதிலாக, அரசு பள்ளி மாணவர்களிடமும் அவர்களது பெற்றோரிடமும் நேரடியாக கருத்துக் கேட்க தமிழக அரசு தயாரா என்றும் வினோஜ் பி. செல்வம் சவால் விடுத்துள்ளார்.
அரசு பள்ளி மாணவர்களின் எதிர்கால நலனை கருத்தில் கொண்டு, பி.எம்.ஸ்ரீ திட்டம் மற்றும் மும்மொழிக் கல்வி குறித்து திறந்த விவாதம் நடத்த தமிழக அரசு முன்வர வேண்டும் என்றும் அவர் வலியுறுத்தியுள்ளார்.
