ஒடிசாவில் பிரதமர் மோடி மற்றும் குடியரசுத் தலைவர் திரௌபதி முர்மு இணைந்து பங்கேற்பு: ரூ.47,600 கோடி மதிப்பிலான வளர்ச்சித் திட்டங்கள் தொடக்கம்
புவனேஸ்வர்: பிரதமர் நரேந்திர மோடி ஜூன் 20-ஆம் தேதி ஒடிசா மாநிலத்திற்கு பயணம் மேற்கொள்ள உள்ளார். இந்த பயணத்தில் இந்திய குடியரசுத் தலைவர் திரௌபதி முர்முவும் பிரதமருடன் இணைந்து பங்கேற்கிறார். மாநிலத்திற்கு இது ஒரு அரிதான மற்றும் முக்கியமான நிகழ்வாகக் கருதப்படுகிறது.
மயூர்பஞ்ச் மாவட்டத்தில் உள்ள பஹாட்பூர் கிராமத்திற்கு காலை 11.15 மணியளவில் குடியரசுத் தலைவரும் பிரதமரும் சென்று, சாந்தாலி ஜஹேரா மற்றும் ஹோ ஜஹேரா எனப்படும் பழங்குடியினரின் புனித வழிபாட்டு தலங்களில் பிரார்த்தனை செலுத்த உள்ளனர். மேலும், அங்குள்ள திறன் மேம்பாட்டு மையம் மற்றும் பள்ளியையும் பார்வையிடுகின்றனர். இந்த பயணம், பழங்குடியினர் மற்றும் கிராமப்புற மக்களின் கல்வி, திறன் மேம்பாடு மற்றும் சமூக-பொருளாதார முன்னேற்றத்திற்கான முயற்சிகளை வெளிப்படுத்தும் வகையில் அமைந்துள்ளது.
பின்னர், பிற்பகல் 1 மணியளவில் ராயரங்க்பூரில் நடைபெறும் ஒடிசா அரசின் இரண்டு ஆண்டு நிறைவு விழாவில் இருவரும் பங்கேற்க உள்ளனர். “விகாஸ் ரா தாரா, ஒடிசா சாரா” என்ற கருப்பொருளில் நடைபெறும் இந்த நிகழ்வில் ரூ.47,600 கோடிக்கும் அதிக மதிப்பிலான வளர்ச்சித் திட்டங்கள் தொடங்கி வைக்கப்படவுள்ளன மற்றும் புதிய திட்டங்களுக்கு அடிக்கல் நாட்டப்பட உள்ளது.எரிசக்தி, தொழில்துறை உள்கட்டமைப்பு, சாலை இணைப்பு, குடிநீர், சுகாதாரம், கல்வி, சுற்றுலா மற்றும் பாசன வசதி உள்ளிட்ட பல்வேறு துறைகளை உள்ளடக்கிய இந்த திட்டங்கள், ஒடிசாவின் உள்கட்டமைப்பு வளர்ச்சியை வலுப்படுத்துவதுடன் வேலைவாய்ப்புகளையும் உருவாக்கும் என எதிர்பார்க்கப்படுகிறது.
முக்கிய திட்டங்களாக 600 மெகாவாட் திறன் கொண்ட அப்பர் இந்திராவதி பம்ப்டு ஸ்டோரேஜ் திட்டம், ஐபி அனல் மின் நிலையத்தின் இரண்டாம் கட்ட விரிவாக்கம் (2 x 660 மெகாவாட்) மற்றும் ஜார்சுகுடா மாவட்டம் லகன்பூரில் பாரத் கோல் கேசிபிகேஷன் அண்ட் கெமிக்கல்ஸ் லிமிடெட் (BCGCL) திட்டத்திற்கு அடிக்கல் நாட்டப்படுகிறது. இத்திட்டங்கள் மாநிலத்தின் எரிசக்தி பாதுகாப்பையும் தொழில்துறை வளர்ச்சியையும் மேம்படுத்தும்.மேலும், புவனேஸ்வரில் திடக்கழிவுகளை அடிப்படையாகக் கொண்ட உயிரி எரிவாயு ஆலை, கட்டக்–புவனேஸ்வர் இடையேயான கதாஜோடி ஆற்றுப் பாலம், தேசிய நெடுஞ்சாலை மேம்பாட்டுத் திட்டங்கள், குசும்திஹி மெகாலிஃப்ட் பாசனத் திட்டம், IGNOU பிராந்திய மையம் மற்றும் உட்புற பேட்மிண்டன் வளாகம் உள்ளிட்ட பல திட்டங்களுக்கும் அடிக்கல் நாட்டப்படுகிறது.
அதேபோல், 300 படுக்கைகள் கொண்ட மாவட்ட தலைமையக மருத்துவமனை, 24 அடல் பேருந்து நிலையங்கள், 9 தானியங்கி வாகன பரிசோதனை மையங்கள், நயாகர் பைபாஸ் சாலை, பல ரயில்வே இரட்டை பாதை திட்டங்கள், ராயரங்க்பூரில் விளையாட்டு வளாகம் மற்றும் பழங்குடியினர் ஆராய்ச்சி மையம் ஆகியவை திறந்து வைக்கப்படுகின்றன.
ஒடிசா மாநிலத்தின் அனைத்து பகுதிகளுக்கும் வளர்ச்சியின் பலன்களை கொண்டு செல்லும் நோக்கில் மேற்கொள்ளப்படும் இந்த திட்டங்கள், மாநிலத்தின் பொருளாதார வளர்ச்சியையும் பழங்குடியினர் மற்றும் கிராமப்புற மக்களின் வாழ்க்கைத் தரத்தையும் மேம்படுத்தும் என மத்திய அரசு தெரிவித்துள்ளது.
