சென்னை: காவிரி ஆற்றின் குறுக்கே மேகதாது அணை கட்டும் கர்நாடக அரசின் முயற்சிக்கு எதிராக தமிழக சட்டப்பேரவையில் இன்று நடைபெற்ற விவாதத்தில் தமிழக காங்கிரஸ் சார்பில் வனத்துறை அமைச்சர் ராஜேஷ்குமார் கடும் கண்டனம் தெரிவித்தார். கர்நாடகாவில் காங்கிரஸ் ஆட்சி இருந்தாலும், தமிழகத்தின் நீர் உரிமை தொடர்பான விஷயத்தில் எந்தவித சமரசமும் செய்ய முடியாது என்பதையும் அவர் வலியுறுத்தினார்.
மேகதாது அணைத் திட்டத்திற்கு எதிராக முதலமைச்சர் விஜய் கொண்டு வந்த தனித்தீர்மானத்தின் மீது பேசிய அமைச்சர் ராஜேஷ்குமார், காவிரி நடுவர் மன்றம் மற்றும் உச்சநீதிமன்ற தீர்ப்புகளின்படி தமிழகத்திற்கு வழங்கப்பட வேண்டிய 177.25 டிஎம்சி நீரை கர்நாடகம் முறையாக வழங்க வேண்டும் என்று வலியுறுத்தினார். மேலும், தமிழக விவசாயிகளின் நலனை பாதுகாக்க அரசு மேற்கொள்ளும் அனைத்து சட்ட மற்றும் அரசியல் நடவடிக்கைகளுக்கும் தமிழக காங்கிரஸ் முழு ஆதரவு அளிக்கும் என்றும் தெரிவித்தார்.
மேகதாது அணை கட்டப்பட்டால் காவிரி நீரை நம்பியிருக்கும் டெல்டா மாவட்ட விவசாயிகள் மட்டுமின்றி, தமிழ்நாட்டின் குடிநீர் தேவையும் கடுமையாக பாதிக்கப்படும் என்ற அச்சம் நீண்டகாலமாக இருந்து வருகிறது. இதனால், அணைத் திட்டத்திற்கு தேவையான தொழில்நுட்ப, சுற்றுச்சூழல் மற்றும் நிர்வாக அனுமதிகள் எதையும் மத்திய அரசு வழங்கக் கூடாது என தமிழக அரசு தொடர்ந்து வலியுறுத்தி வருகிறது.
சட்டப்பேரவையில் நிறைவேற்றப்பட்ட தீர்மானத்தின் மூலம், காவிரிப் படுகை மாநிலங்களின் ஒப்புதல் இன்றி கர்நாடகம் எந்த திட்டத்தையும் செயல்படுத்த முடியாது என்றும், மேகதாது அணைத் திட்டத்தை தடுத்து நிறுத்த தேவையான அனைத்து சட்ட நடவடிக்கைகளும் தொடரும் என்றும் தமிழக அரசு தெரிவித்துள்ளது.
கர்நாடக காங்கிரஸ் அரசின் நடவடிக்கைக்கு எதிராக தமிழக காங்கிரஸ் வெளிப்படையாக எதிர்ப்பு தெரிவித்திருப்பது அரசியல் ரீதியாக முக்கியத்துவம் வாய்ந்ததாக பார்க்கப்படுகிறது. “கூட்டணி அரசியல் வேறு, தமிழக உரிமை வேறு” என்ற நிலைப்பாட்டுடன், காவிரி உரிமை மற்றும் விவசாயிகள் நலனுக்காக தமிழக காங்கிரஸ் தொடர்ந்து குரல் கொடுக்கும் என அமைச்சர் ராஜேஷ்குமார் தெரிவித்தார்.
