பாமக தலைவர் டாக்டர் அன்புமணி ராமதாஸ், ஜூலை 18-ஐ தமிழ்நாடு நாளாகக் கொண்டாடும் நடைமுறையை தவெக அரசும் தொடரக்கூடாது என்றும், நவம்பர் 1-ஆம் தேதியே தமிழ்நாடு நாளாகக் கொண்டாடப்பட வேண்டும் என்றும் வலியுறுத்தியுள்ளார்.
அவர் வெளியிட்டுள்ள அறிக்கையில், தமிழ்மொழி மற்றும் தமிழர் வரலாற்றை மாணவர்களிடம் கொண்டு செல்லும் நோக்கில் பள்ளிகளில் பேச்சுப் போட்டி, கட்டுரைப் போட்டி நடத்துவது வரவேற்கத்தக்கது என்றாலும், அதற்காக வரலாற்றை மாற்றிக் காட்டக் கூடாது என்று தெரிவித்துள்ளார்
. அன்புமணியின் விளக்கப்படி, 1956 நவம்பர் 1-ஆம் தேதி மொழிவாரி மாநில மறுசீரமைப்பின் மூலம் இன்றைய தமிழ்நாட்டின் நில எல்லைகள் உருவாக்கப்பட்டன. அதேபோல் கர்நாடகம், கேரளம், ஆந்திரப் பிரதேசம் மற்றும் புதுச்சேரி ஆகியவை நவம்பர் 1-ஐ தங்களது மாநில நாளாகக் கொண்டாடி வருகின்றன. இதே அடிப்படையில் தமிழ்நாட்டுக்கும் நவம்பர் 1-ஆம் தேதியே தமிழ்நாடு நாளாக இருக்க வேண்டும் என அவர் கூறியுள்ளார்.
மேலும், ஜூலை 18 என்பது அப்போது சென்னை மாகாணத்தின் பெயரை “தமிழ்நாடு” என்று மாற்றுவதற்கான தீர்மானம் சட்டப்பேரவையில் நிறைவேற்றப்பட்ட நாள் மட்டுமே என்றும், மாநிலம் உருவான நாள் அல்ல என்றும் அவர் சுட்டிக்காட்டியுள்ளார். மாநிலத்திற்கு பெயர் சூட்டிய நாளை மாநில நாளாகக் கொண்டாடுவது வரலாற்று ரீதியாக சரியல்ல என்றும் அவர் தெரிவித்துள்ளார்.
எனவே, திமுக அரசு பின்பற்றிய இந்த நடைமுறையை தற்போதைய தவெக அரசும் தொடராமல், தமிழ் அறிஞர்கள், வரலாற்று ஆய்வாளர்கள் மற்றும் எல்லைப் போராட்ட தியாகிகளுடன் ஆலோசித்து, நவம்பர் 1-ஐ தமிழ்நாடு நாளாக அதிகாரப்பூர்வமாகக் கொண்டாட நடவடிக்கை எடுக்க வேண்டும் என அன்புமணி ராமதாஸ் வலியுறுத்தியுள்ளார்.
