காஞ்சிபுரம் மாவட்டம் உத்திரமேரூர் அருகேயுள்ள அரசு பள்ளியில் தமிழ்நாடு வெற்றிக் கழக நிர்வாகிகள் நடத்திய செயல்பாடு சர்ச்சையை ஏற்படுத்தியுள்ளது.தகவல்களின்படி, 20-க்கும் மேற்பட்ட தவெக நிர்வாகிகள் பள்ளி வளாகத்திற்குள் நுழைந்து, வகுப்பறை சுவரில் கட்சித் தலைவர் விஜயின் உருவப்படத்தை மாட்டியதாக கூறப்படுகிறது.
பின்னர் மாணவர்களுடன் வகுப்பறையிலேயே கலந்துரையாடிய அவர்கள், அதனை வீடியோவாக பதிவு செய்து சமூக வலைதளங்களில் ரீல்ஸாக வெளியிட்டுள்ளனர்.சமூக வலைதளங்களில் பரவி வரும் காட்சிகளில், மாணவர்கள் முன்னிலையில் தவெக நிர்வாகிகள் வகுப்பறைக்குள் இருப்பதும், விஜய் உருவப்படம் வைக்கப்பட்டிருப்பதும், வீடியோ பதிவு நடைபெறுவதும் காணப்படுவதாக தகவல்கள் தெரிவிக்கின்றன.இந்த சம்பவம் கல்வி வளாகங்களில் அரசியல் நடவடிக்கைகள் மேற்கொள்ளப்படலாமா என்ற கேள்வியை எழுப்பியுள்ளது.
பள்ளி வகுப்பறைகள் கல்வி கற்பதற்கான இடமாக இருக்க வேண்டுமே தவிர, அரசியல் அடையாளங்கள் மற்றும் விளம்பர நடவடிக்கைகளுக்கான மேடையாக மாறக்கூடாது என பலரும் கருத்து தெரிவித்து வருகின்றனர்.அரசுப் பள்ளிக்குள் அரசியல் கட்சி நிர்வாகிகள் நுழைந்து மாணவர்களுடன் நிகழ்ச்சி நடத்தியது எப்படி அனுமதிக்கப்பட்டது என்ற கேள்வியும் தற்போது எழுந்துள்ளது. இந்த விவகாரம் தொடர்பாக கல்வித்துறை மற்றும் மாவட்ட நிர்வாகம் விளக்கம் அளிக்க வேண்டுமென கோரிக்கைகள் வலுத்து வருகின்றன.
